АБВ

МИНЕМ ИҖАТ

 

Мин, Адилә Зирәк кызы Кондратьева (Хәлимова) бормалы Ык буйларында урнашкан Мөслим районы Салавыз-Мухан авылында туып үскәнмен. Кечкенәдән үк шигырьләр ятлап, аларны өйдәге “тамашачылар” алдында сәнгатьле итеп сөйләргә ярата идем. Шигърияткә булган мәхәббәтемә нигез шул вакытта салынган дип уйлыйм. Беренче шигыремне 10 яшемдә яздым, ул “Әни эшкә киткәч” дип атала.

 

“Ничек шигырь яза башладыгыз?” дигән сорауга төгәл генә җавап бирүе кыен. Шигырь кеше күңелендә үзеннән-үзе барлыкка килә. Бөгелмә педагогия училищесына укырга килгәч, күңелемдә туган ягым, гаиләм, дусларымны сагынудан барлыкка килгән юксыну хисләрен шигырь юлларына салдым.

 

Кызыклы төш

​

Назлы гөлләр, күбәләкләр куып,

Урман аланында шактый йөрдем.

Сихри тавышларны тыңлый-тыңлый,

Карурман эченә барып кердем.

Караңгылык, сихри караңгылык.

Куркыныч та, тик үзенә тарта!

Җиңнән ботак-чатак эләктерә,

Күңелемдә кызыксыну арта...

Күзгә төртсәң, берни күреп булмый –

Кайсы якта мин, кай тарафта?

Чак уянып киттем, төшем икән:

Җиңнән кече энекәшем тарта.

 

 

Ашыкмыйк әле

​

Югаласым килә кочагыңда,

Эреп синең назлы сүзеңнән.

Бер үбәсем килә сине, җаным,

Пар йолдыздай серле күзеңнән.

Бары синең бердәнберең булып,

Килә яратасым, назлыйсым...

Кайнар сулышыңнан эреп китәм,

Сиңа карарга да базмыймын.

Эреп бетеп, кереп сыеныр идем,

Синең җылы, назлы куеныңа.

Аермасын гына безне язмыш,

Бул янымда, һәрчак уемда.

 

 

Соңгысы булып кал

​

Очраттым да сине кышкы кичтә,

Күңелемне биләдең бит, җаным.

Дөнья иркен, яшәүләре рәхәт:

Нурлар сибеп ата һәрбер таңым.

Син бит минем өчен якты кояш,

Ә суыкта – талгын кар бөртеге.

Син – беренче мәхәббәтем минем,

Соңгысы да булып кал инде.

                                2009 ел.

 

Килмәссеңме?

​

“Сиңа”, - дип балкый күзләрем,

“Син”, - диеп тибә йөрәк.

Гөлләр кояшка үрелә,

Миңа син булу кирәк.

Мин кояш булып елмаям,

Син иркәлисенә җилдәй.

Яраткандыр безне Ходай

Бер беребез өчен җиргә.

Кояшны Ай алыштыра,

Каенга нарат кирәк.

Янып яшәү өчен, сиңа – мин,

Миңа син булу кирәк.